Un sereno Natale di pace a tutti

'O Presepio

A Natale, me ricordo,

o'presepio appriparavo;

cu 'na spesa 'e poche sòrde:

grotta e case fravecàvo.

Colla 'e pesce e cartapesta,

grastulelle e tavulette.

Se senteva addor'e'festa

'e Gesù...quanno nascette.

Te facevo 'o sciummetiello

cu 'na striscia 'e cart'argiento;

case vecchie e grariatelle,

'e facevo dint' 'a niente.

'A puteca d' 'o chianchiere,

'o pagliaro pe' Benino,

'o negozio a 'o salumiere

cu 'e salcicce e 'o salamino,

magazzino a 'o verdummaro,

e 'o fucon' a 'o castagnaro:

c' 'o cartone 'e fravecavo.

Po' accucchiavo nu castiello,

po' apparavo 'a tratturia,

'nnanz' 'a stalla nu canciello,

'na sagliuta,n'ata via.

Ce vulevano 'e ferriate?

Cu 'e palicche 'e cumbinavo;

sino', 'a copp'a scalinata

'o pastore ruciuliava.

Po' c' 'o vverde e c' 'o bbianchetto:

erba e neve,me pittavo;

me parevo 'o Tintoretto,

quann' 'e quadre se guardava.

Quann'avevo:luna e stelle,

fatt' 'e carta:luna e stelle,

fatt' 'e carta 'e ciucculata,

azzeccavo chesta e chelle.

Era tutto terminato!

'E pasture, po' accattàvo:

Ciccio Bacco,'e pecurelle.

pur' 'o bue e l'asinello.

Po' , 'a vigilia, a mezanotte,

'mprucessione se purtava:

'o Bambino dint' 'a grotta.

Ninna nanna...Se cantava!

                   Tommaso Ricciardi